وصلنى تاج جامد جدا من مدونة أجمد وهى مدونة غريب لصاحبها ومديرها عبد الرحمن عياش( طبعا غنى عن التعريف) والتاج ده فرحنى جدا لسببين
أولا : إن ده أول تاج يتمررلى ودايما أول حاجة بيكون تأثيرها على النفس جميل ده غير إنها مبتتنسيش
ثانيا: إن التاج جالى من مدونة جمييلة جدا جدا وأنا عن نفسى من متابعيها
يعنى..... حبيت أوضح
نبتدى الإجابة..... إستعنا على الشقى بالله
أول سؤال
قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟
هو فى فترة أنا متخيلاها.... نقدر نقول بعد 67 وقبل 73
فى الفترة دى كان الشعب إيجابى وفى منتهى الحماس وعنده إصرار على إسترجاع حقه وكان فى حراك سياسى وجماهيرى ..كان فى حياة
ده غير إن الناس كانت لسة بطيبتها ومرؤتها وكان المصرى مازال محتفظ بهيبته
أول أولوية فى حياتك عيلتك ولا شغلك ولا اصحابك؟
على حسب كل مرحلة فى حياتى ... عموما أنا بحب العيلة والبيتوتية , لكن برضوه شغلى إللى أنا بحبه مقدرش أستغنى عنه لأنه مكمل لحياتى, أما أصحابى فهما الحاجة إللى بنيتها أحب دايما يكونوا معايا
ايه أكتر حاجة بتحبيها فى رمضان ؟
وقتين .... من بعد الفجر لغاية بعد الشروق بشوية
والوقت التانى قبل الفطار بحوالى نص ساعة
عموما أنا بحب الشروق والغروب فما بالكوا فى رمضان
اوصف أجمل فطار ممكن تفطره؟
مرة كان عندنا لقاء فى رمضان وكان الموضوع عن الزهد وحبوه يطبقوا عملى وفطرونا
زيت كريستال و ملح و خل و طبعا عيش
وكان أحلى فطار فطرته لإنى أصلا مبحبش الأكل
لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟
إن شاء الله أكون عادلة لسبب بسيط إنى دقت قسوة الظلم وعرفت معناه
وهتأكد إزاى لما أنام و أنا مطمنة وهادئة البال( عدلت . فأمنت . فنمت يا عمر)ا
مين أكتر اعلامى مصرى بتحترمه ؟
لازم حكاية مصرى ديه... مفيش مشاكل
أحمد منصور مع إنه بينرفزنى أحيانا
حمدى قنديل
منى الشاذلى بيعجبنى حضورها وكاريزمتها
محمد حسنين هيكل كشخص قدر يحافظ على مكانه حتى الآن
لو ممكن تشتغل شغلانة تانية كنت تتمنى تبقى ايه ؟؟
طب لما أشتغل الأولانية الأول
بس كنت أحب أبقى مخرجة سينما
ايه تانى بلد تتمنى تعيش فيها بعد مصر ؟؟
تركيا.. كنموذج لبلد إسلامى قدر يوصل لمكانة بين الأمم
وأعمل سياحة بس فى ماليزيا
وميمنعش برضوه إنى بحب الفرنسيين كشعب راقى وبحب النظام والإلتزام فى بريطانيا
والألمان حكااااااية
اوصف ترتيبات اجمل فرح ممكن تحضره ؟
بالظبط مش عارفة
لكن تكون حاجة بسيطة جدا من غير دوشة لإنى بتضايق منها وأهم حاجة إن الناس والعروسين يكونوا فرحانين بجد من قلبهم ..مش هيفرق بقى المكان ولا أى حاجة خالص
وبصراحة نفسى أشوف زفة خيل أوجمال ...... مستحيل صح؟؟؟
بتراعى كلام الناس والقيل والقال ؟؟ ولو اه او لا قول ليه ؟
آآآآآآآآآآآآآآآآآآآآه براعى وأحيانا ده بيضايقنى
أما ليه , فلإن إحنا مجتمع عايش مع بعضه مينفعش أنفصل عنه بتصرفاتى ولا بأفكارى
فأنا فى النهاية جزء من كل هذا الكل يهمنى بشكل ما
صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟
نوعا ما هكون سعيدة لإنى بكده هقدر آ خد هدنة مع نفسى , بس السعادة دى مظنش إنها هتدوم كتير لإنى همل الوضع
بس بحس إن الناس إللى عاشوا فى العصور دى حياتهم كانت أنقى من حياتنا وبالتالى أسعد... مش عارفة
السعادة هى ..؟
راحة البال بما فى ذلك الرضا والإقتناع التام بكل تفصيلة فى حياتى , وما يبعثه ذلك من هدوء وسكينة فى النفس
عندك أمل ؟ اسبابك ؟
فى معظم الأوقات بيكون عندى أمل ,أسباب الأمل بالنسبة ليا معنوية أكتر من إنه حاجة مادية لإنى لو بصيت حواليا فى الدلائل المادية هيجيلى إكتئاب مش بس هفقد الأمل
لما بتحب تهرب من كل شئ بتروح فين ؟؟
على أوضتى وتحديدا السرير... وأحط سماعات ال إم بى 4 فى ودنى يأنام... يمنامش بس فى الأغلب بنام نوم عمييق جدا
امتى اول مرة خدت فيها نفس طويل وقلت ياااه انا فعلا كبرت ؟؟
لسه مجتش أول مرة
بس أول يوم فى الجامعة حسيت إنى لازم أكبر
بتشرب سجاير ؟؟ وايه شعورك اما ست او راجل بيشرب سجاير ؟ ليه ؟
أعوذ بالله
شعورى مختلف من ولد لبنت الولد بحس إنه إنسان هايف متخيل إنه أثبت نفسه بالسيجارة
البنت بحس إنها ضايعة جدا وتايهة والسيجارة نتيجة حياة متلخبطة
والاتنين بيصعبوا عليا وفى نفس الوقت بيضيقونى
بتعرف ايدك اليمين من الشمال ازاى ؟؟
بعلامة على إيدى اليمين ده غير إنى تعباها معايا فى الأكل والشرب والكتابة وغيره
ايه اكتر الة موسيقية بتحبها ؟
الجيتار
فى رأيك ليه الذوق والنخوة اتعدموا؟؟
هما يعنى متعدموش خالص... لكن نقول قلوا
الذوق لأن الحياة المادية وسرعتها معدتش تسمح بذوقيات
النخوة: لأن إنتشرت فينا ثقافة (وأنا مالى )ا
ايه الحاجة اللى لو حصلت لك حتبقى سعيد اوى ؟
إنى أحقق إللى بحلم بيه فى كل نواحى حياتى, ومتكنش حياتى رتيبة وعادية
خروجة حلوة مع صحابى أو قعدة رايقة مع أنتيمتى
كتاب وسماعات إم بى 4 وشيكولاتة جالاكسى وكانز
دى حاجات شخصية
عامة بقى .. هموت من الفرحة لو الشعب ده إتحرك وانتفض عن بكرة أبيه للمطالبة بحقوقه ساعتها هبقى سعيدة جدا حتى لو مخدش الحقوق دى بس يتحرك
تحب يبقى عندك ارض زراعية ولااجدد عربيات ولاكام عمارة ولافلوس فى البنك ؟
لأ أحب يكون عندى أجدد العربيات أو بالأحرى عربية مكشوفة واحدة أنطلق بيها مع صحابى
البحر ولا النيل ؟
البحر بحس إنه متخاصم مع نفسه وعلى طول هايج
النيل بيبقى متصالح مع نفسه وعلى طول هادى ورايق
عشان كده بحب النيل
مركب ولا طيارة؟
بخاف من الاتنين
لكن المركب بالنسبة ليا أبسط وأحلى من الطيارة
مجنون ولا عاقل ؟
فى أغلب الأحوال مجنونة وبرضوه بيقولوا عليا عاقلة
تقرا كتاب ولا تتفرج على فيلم ؟
حسب مودى , لو مركزة يبقى كتاب ,لو مش مركزة يبقى فيلم
تمرر التاج ده لمين ؟
أمرر التاج لمين
سؤال صعب
طيب نشوف
للأخ طال الليل
ولهمسة قلم.... سمسم
فوضى منظمة أ\ شاهنشى
وإسلام ناجح
وعبد الرحمن سبقنى لأسماء ياسر
بس كده خلالالالاص
ا
16 comments:
جزاكم الله خير ايتها الفزلوكة .. انا بصراحة عندي موقف تقدري تقولي حضرتك أنه - موقف ايدولوجي - من التاجات الشخصية .. بس هأفكر اني ارد عليه .. صحيح انا معرفش ايه حكاية مخرجيين السينما .. بقالي فترة كل ما اعرف حد يقولي انا نفسي اطلع مخرج سينما .. على العموم بالتوفيق
شوفي انا ما بحبش الاخوان اللي انتي حاطة صورتهم
و لكن زيارتي لمدونتك لم يندم عليها مقام حظرتنا ملك الكبدة الاول
جالك تاج و احنا بقالنا في خدمة بلوجر كتير ما وصلناش ولا تاج غير التاج الملكي اللي هو عبارة عن طبق الكبدة
مدونة تسعد من يزورها
أخت زهراء متشكر خالص ع التاج
وبإذن الله أجاوب عليه
ع العصر كدا ولا الظهر
يكون التاج جاهز
تحياتي
شكرا جدا خالص اوي يازهراء على التاج :)
اجاباتك جميلة اوي يازهراء وعجبتني حكاية العربية المكشوفة دي ..نفس الحلم تقريبا بس انا مش عايزاها مكشوفة :D
هو التاج ده وصلك انتى كمان .. خسارة كنت مررته ليكى من يومين تقريبا ملكيش نصيب تاخديه منى ..
إجاباتك لذيذة جدا .. وواضح منها أنك بتحاولى تستمتعى بحياتك بالرغم من الظلم ...
لك منى تحية :)
ازيك يا زهروءة
شكرا يا ستى
دايما فاكرانا كده
:1
زيت كريستال و ملح و خل و طبعا عيش
ما شاء الله
طب جربتى لمون بقشره
هيعجبك أوى أوى
:1
اشوفك قريب ان شاء الله يا زهراء
دعواتك
اجاباتك ما شاء الله منطقية وروعة
بس لو صحيتي من النوم وملاقتيش الكمبيوتر ازاي هتكتبي علي المدونة
ولا دي مش حاجة تزعل؟؟
اختى زهراء
سعدت بزيارتى لمدونتك
وما شاء الله إجباتك تتسم بالصدق والصراحة
بارك الله فيكِ
اتمنى أن تقبلينى أختاً لك
باشمهندس \ شاهنشى
أنا عارفة هذا الموقف الإيدولوجى مسبقا بس حبيت أجرب... يمكن
وكنت عايزة أقول لحضرتك إن إجاباتك على الأسئلة ممكن تجعلها عامة مش شخصية
يعنى فى رأيى على حسب الإجابات بتتحد التاجات
لو حبيت تجرب
أما مخرجين السينما الكتير فده يمكن لأننا أدركنا مؤخرا أهمية السينما
أو فجأة بقينا مبدعين ولينا عين سينيمائية
ملك الكبدة
أولا شكرا على الكلام الجميل
والمجاملات اللذيذة دى
بس ممكن أعرف حضرتك مبتحبش الإخوان ليه؟؟؟
مجرد سؤال محتاج مجرد جواب
أتمنى أن تزورنا دايما
وسلالام
إسلام ناجح
لاشكر على واجب وهعدى أشوف إجاباتك إن شاء الله
همسة قلم ...سمسم
إيه التشكرات الكتيرة دى
من دواعى سرورنا يافندم إنى أمررلك تاج
بس عايزة الإجابة
وبالنسبة لحلم العربية أحب أقولك إنه كان فيه حلم أفظع بالعربية
بس قولت بلاش الناس مش مستحملة
نورتيييينا
ابن مصر
مرة تانية يا فندم ؟إن شاء الله وعلى كل الأحوال شكرا جزيلا على التمريرة الحلوة دى
أما إستمتاعى بالحياة رغم الظلم فده صحيح لإن كده إحنا نقدر نستمر
سمسماية الفجرية
لمون بقشره !!!!!!!
وإحنا بنفطر يومها طنط قالتلنا إحمدوا ربنا
أنا بقى أكلت ورق شجر!!!!!
تربية بقى .. تقولى إيه؟؟؟
التوأمان يعلقان يا مرحبا يا مرحبا
نورتوا المدونة يا فنانين
منطقية وروعة!!!!دى إجاباتى
رفعتوا روحى المعنوية
متشكرين
أمة الله
اتمنى أن تقبلينى أختاً لك
.
.
.
تقبلتك ..إدخلى برجلك اليمين
أولا شرفتى المدونة بزيارتك
ثانيا ياريت تكرريها
ثالثا شكرا على كلامك الجميل
وبس
Post a Comment