ليه ياجماعة أحيانا بيكون إهتمامنا بالشكليات أكتر من إهتمامنا بالمضمون ؟ ليه بنحول المشاعر لمجرد كلمات وتكليفات فى بعض الأحيان بتفتقد إلى الصدق ؟؟ أنا بقول الكلام ده بسبب موقف إلى الآن لم أتخذ قرارى فيه بس بجد زعلنى وضايقنى جدا جدا جدا وآدى الحكاية أنا السنة دى أول سنة ليا جامعة , دخلت الجامعة وأنا كلى حماس من الناحيتين الدراسية والدعوية , وكنت حريصة إنى أتعرف على الأخوات وأعرف طبيعة الشغل فى الجامعة وبالفعل تعرفت على معظم الأخوات وبدأت تدريجيا أتفهم طبيعة العمل الدعوى فى الكلية وعرفت بالطبع المعوقات الأمنية الموجودة . وفى تعاملى مع الأخوات سبحان الله وجدت أن رابطا ما يربطنا ويجمعنا رغم قصر مدة معرفتى بيهم وكان من الطبيعى أن يكون هناك أشخاص إرتحت لهم أكتر ووجدت بيننا تقاربا روحيا وفكريا لغاية هنا والأمور تسير طبيعيا طبعا كان فى بعض الحاجات إللى مبحبهاش فى التعامل زى مثلا الإكثار من قول كلمة ( إنى أحبك فى الله)و الغريب أن ممكن أوى واحدة تقولهالى وإحنا لسة بنتعرف وبعض الحاجات التانية إللى ممكن تعدى وجت الحاجة إللى مش عارفة أعديها مؤخرا جتلى أخت وإدتنى ورقة فيها زى إستبيان عن حقوق الإخوة فى الله وكانت المفاجأة إن الورقة دى بتتوزع على إتنين إتنين مختارين بالقرعة والمفروض إنهم ينفذوا ما بينهم حقوق الأخوة الموجودة فى الورقة دى وأنا بقى جه حظى مع أخت معرفهاش خالص ولا عمرى قابلتها ولا هى تعرفنى والمفروض إنى أنفذ معاها الواجبات إللى فى الورقة (إللى بجد جامدة) ا وعشان تعرفوا طبيعة المشكلة أحب أقولكوا إنى من الأشخاص إللى مبيحبوش يعملوا حاجة مش مقتنعين بيها لإنى ببساطة مبعرفش وأنا مش مقتنعة بالتكليف ده حاسة إنه نفاق لأنى فى النهاية المفروض إنى أنفذ الورقة دى بحب مش عشان هو تكليف وأنا مبحبش الإنسانة إللى معايا لأنى أصلا معرفهاش هيبقى عمل روتينى أنا بنفذ تكليف وهى كذلك وأنا مبعرفش أعمل كده خالص أنا حيرانة أخالف طبعى وأنا متأكدة إنى مش هنجح وأننفذ التكليف من باب إدخال السرور لكن ساعتها مش هبقى مستريحة وهيزيد الصراع إللى جوايا ولا أرفض وأنا متأكدة إن الموضوع لن يمر مرور الكرام إللى مضايقنى بجد النظام نفسه , يعنى إيه الهدف من ده, لو كان الإخوة مظنش إنها بتيجى بورق وتكليفات أنا بجد محتارة وعايزة آخد قرار