مشهد 1
يوم 3\5
راجعة من مؤتمر بنقابة الصحفيين , كان بعنوان (الدستور وتطبيقه على الواقع ) دا كان العنوان أما المضمون فكان بخصوص الإضراب اليوم إللى بعده
تحدث فى المؤتمر عمو عمرعبدالله وبابا و عمو جمال تاج الدين
و
جورج إسحاق: سنضرب لنعلن حقنا
عبد الحليم قنديل : لم يعد يجدى مع هذا النظام أى أساليب سوى العصيان والإضراب وغيرها من وسائل الرفض السلمية
كريمة الحفناوى : سيكون غدا يوما للتكاتف
واتفق الجميع على أن علاوة ال30% لن تثنى هذا الشعب عن قراره
وأن هذا الشعب "إللى هوا إحنا " يملك من الوعى الكافى ليدرك أن ذلك مجرد خدعة ومسكن وقتى .........إلخ إلخ
أنا : فرحانة جدا جدا , بجد راجعة وأنا كلى أمل فى بكرة وفى الشعب دا وفى مستقبلنا الأفضل إللى هنصنعه بإيدينا
وأكتر حاجة فرحتنى بجد إنى حسيت إن فى ناس بتحب البلددى و الأهم إنها مستعدة تضحى غير الإخوان
وعلى الرغم من العربية إللى عطلت بينا فى الطريق والجهود المستميتة التى بذلت لإصلاحها , إلا أننى لم أتنازل عن فرحتى والتى عبرت عنها بابتسامة ظلت مرسومة على وجهى "حتى وإحنا واقفين جنب العربية وهى عطلانة "
المهم
الحمدلله عدنا بحمد الله إلى أرض الوطن إللى هوا بيتنا الساعة 3 فجرا
وأنا لسه فرحانة
مشهد2
تانى يوم
4\5
الجزيرة : الحركة فى شوارع القاهرة طبيعية
يمكن الجزيرة قلبت حكومى
العربية كذلك
البى بى سى شرحه
المدونات بقى
كانت البداية بصدمة هوامش البلد بلدنا
وتوالت الصدمات
مش عارفة أقولكم إحساسى كان إيه ساعتها
عارفين لما حد يحرجكوا ويكسفكوا , أهوأنا كنت حاسة بكدا ,, ومحدش يسألنى ليه
بجد كنت حاسة إن الشعب خذلنى قدام نفسى
ولا عزاء لصوتى إللى راح وأنا بدافع عن الإضراب وعن إيجابية الشعب وثقافته التى تغيرت
ورااااااااحت الفرحة
مشهد3
5\5
بالظبط حوالى الساعة الرابعة عصرا
سائق التاكسى إللى أنا راكبة فيه بيتكلم فى التليفون : أيوه بتقول غلى لكام ...الله يخرب بيوتهم
وأنا طبعا مش فاهمة حاجة
عند أول بنزينة ويركن
وأنا برضوا مش فاهمة حاجة
ينزل من التاكسى ويروح البنزينة ويرجع
لتر البزين غلى خمسين قرش ..نروح فين بعد كدا
وهنا ...........فهمت كل حاجة
نزلت من التاكسى
الحمدلله وصلت بالسلامة
لكن وأنا نازلة لقيت خناقة
سائق ميكروباص بيتخانق تقريبا مع راكب
الأخ السائق زود الأجرة والأخ الراكب طبعا مش راضى
الأخ السائق : من بكرة هتدفعوا خمسين قرش زيادة إن شا الله أروح إسراءيل مش أمن الدولة !
الأخ الراكب : حرام عليكوا إنتوا بتستغلوا الظروف
الأخت المتفرجة " إللى هوا أنا " قررت الرحيل قاطعة عليكم المشهد
فى اللحظة دى بالذات لم أتعاطف مع الراكب ولا السائق ولا مع السبعين مليون
فالحقوق لا توهب خاصة مع نظام مثل نظامنا
والكرامة لاتستجدى خاصة مع وضع مثل وضعنا
إذا فلنتحمل جميعا طالما لم نتحرك جميعا
ولا يشتكى أحد
يا شعبا استعذب الشكوى
بس أكتر حاجة عجبتنى فى الخناقة دى ... لغة الحوار ,,, راقية راقية يعنى , ماشاء الله
مشهد 4
6\5
إنسانة كدا قاعدة قدام دكتورة كدا ,وإنسانة تانية قاعدة قدام دكتور تانى فى لجنة كدا يقال عنها إنها لجنة إمتحان شفوى أو عملى إللى تحبوه
الدكتور للدكتورة: تصورى يا دكتورة البنات مخارج الحروف عندهم بايظة خالص , البنت قاعدة بتجاوب ولا كإنها مذيعة فى التلفزيون ": على البنت إللى بيمتحنها فى سنة أولى :"ء
الدكتورة للدكتور : للأسف يادكتور دلوقتى بقينا بنضرب المثل بالمذيعات فى رداءة الأداء وليس جودته
الدكتور للدكتورة والدكتورة للدكتور .......... وفجأة قلب الموضوع على غلو البنزين وإزاى دا هيأثر على حال المعيشة وغلو باقى السلع مع ثبات المرتبات و, ,....,و ,....., و
أنا للإتنين : ممكن إتسإل ؟؟
مفيش مانع على فكرة تربطوا المشاهد مع بعضها
على أساس أن ما يحدث على المستوى الإقتصادى جزء من كل
فالفساد منظومة متكاملة ومقننة فى بلادنا
فنحن نعيش فى بلد يشتكى فيه السائق والأستاذ الجامعى على حد سواء من إرتفاع الأسعار والتعب المعيشى
فلكم أن تتخيلوا كيف سيكون وضع هذا البلد سياسيا وعلميا وتنمويا
مشهد5
7\5
إنسانة برضوا عارفة إنها مقصرة فى حق المدونات كلها وحاسة بالذنب , لكن أعمل إيه
عندى 8 مواد ولله الحمد ومن غير حسد هما خالصين ومتقفلين من أول الترم !!!!؟
بس مفيش مانع برضوا من المراجعة
فعذرا من الجميع على عدم المتابعة وإن شاء الله هخلص إمتحانات على خير وأقيم عندكوا
بس أهم حاجة الدعاء
بجد بجد ضرورى يعنى نظرا لوضعى الحرج مع كتب الدراسة
ودمتم
