مشهد 1
يوم 3\5
راجعة من مؤتمر بنقابة الصحفيين , كان بعنوان (الدستور وتطبيقه على الواقع ) دا كان العنوان أما المضمون فكان بخصوص الإضراب اليوم إللى بعده
تحدث فى المؤتمر عمو عمرعبدالله وبابا و عمو جمال تاج الدين
و
جورج إسحاق: سنضرب لنعلن حقنا
عبد الحليم قنديل : لم يعد يجدى مع هذا النظام أى أساليب سوى العصيان والإضراب وغيرها من وسائل الرفض السلمية
كريمة الحفناوى : سيكون غدا يوما للتكاتف
واتفق الجميع على أن علاوة ال30% لن تثنى هذا الشعب عن قراره
وأن هذا الشعب "إللى هوا إحنا " يملك من الوعى الكافى ليدرك أن ذلك مجرد خدعة ومسكن وقتى .........إلخ إلخ
أنا : فرحانة جدا جدا , بجد راجعة وأنا كلى أمل فى بكرة وفى الشعب دا وفى مستقبلنا الأفضل إللى هنصنعه بإيدينا
وأكتر حاجة فرحتنى بجد إنى حسيت إن فى ناس بتحب البلددى و الأهم إنها مستعدة تضحى غير الإخوان
وعلى الرغم من العربية إللى عطلت بينا فى الطريق والجهود المستميتة التى بذلت لإصلاحها , إلا أننى لم أتنازل عن فرحتى والتى عبرت عنها بابتسامة ظلت مرسومة على وجهى "حتى وإحنا واقفين جنب العربية وهى عطلانة "
المهم
الحمدلله عدنا بحمد الله إلى أرض الوطن إللى هوا بيتنا الساعة 3 فجرا
وأنا لسه فرحانة
مشهد2
تانى يوم
4\5
الجزيرة : الحركة فى شوارع القاهرة طبيعية
يمكن الجزيرة قلبت حكومى
العربية كذلك
البى بى سى شرحه
المدونات بقى
كانت البداية بصدمة هوامش البلد بلدنا
وتوالت الصدمات
مش عارفة أقولكم إحساسى كان إيه ساعتها
عارفين لما حد يحرجكوا ويكسفكوا , أهوأنا كنت حاسة بكدا ,, ومحدش يسألنى ليه
بجد كنت حاسة إن الشعب خذلنى قدام نفسى
ولا عزاء لصوتى إللى راح وأنا بدافع عن الإضراب وعن إيجابية الشعب وثقافته التى تغيرت
ورااااااااحت الفرحة
مشهد3
5\5
بالظبط حوالى الساعة الرابعة عصرا
سائق التاكسى إللى أنا راكبة فيه بيتكلم فى التليفون : أيوه بتقول غلى لكام ...الله يخرب بيوتهم
وأنا طبعا مش فاهمة حاجة
عند أول بنزينة ويركن
وأنا برضوا مش فاهمة حاجة
ينزل من التاكسى ويروح البنزينة ويرجع
لتر البزين غلى خمسين قرش ..نروح فين بعد كدا
وهنا ...........فهمت كل حاجة
نزلت من التاكسى
الحمدلله وصلت بالسلامة
لكن وأنا نازلة لقيت خناقة
سائق ميكروباص بيتخانق تقريبا مع راكب
الأخ السائق زود الأجرة والأخ الراكب طبعا مش راضى
الأخ السائق : من بكرة هتدفعوا خمسين قرش زيادة إن شا الله أروح إسراءيل مش أمن الدولة !
الأخ الراكب : حرام عليكوا إنتوا بتستغلوا الظروف
الأخت المتفرجة " إللى هوا أنا " قررت الرحيل قاطعة عليكم المشهد
فى اللحظة دى بالذات لم أتعاطف مع الراكب ولا السائق ولا مع السبعين مليون
فالحقوق لا توهب خاصة مع نظام مثل نظامنا
والكرامة لاتستجدى خاصة مع وضع مثل وضعنا
إذا فلنتحمل جميعا طالما لم نتحرك جميعا
ولا يشتكى أحد
يا شعبا استعذب الشكوى
بس أكتر حاجة عجبتنى فى الخناقة دى ... لغة الحوار ,,, راقية راقية يعنى , ماشاء الله
مشهد 4
6\5
إنسانة كدا قاعدة قدام دكتورة كدا ,وإنسانة تانية قاعدة قدام دكتور تانى فى لجنة كدا يقال عنها إنها لجنة إمتحان شفوى أو عملى إللى تحبوه
الدكتور للدكتورة: تصورى يا دكتورة البنات مخارج الحروف عندهم بايظة خالص , البنت قاعدة بتجاوب ولا كإنها مذيعة فى التلفزيون ": على البنت إللى بيمتحنها فى سنة أولى :"ء
الدكتورة للدكتور : للأسف يادكتور دلوقتى بقينا بنضرب المثل بالمذيعات فى رداءة الأداء وليس جودته
الدكتور للدكتورة والدكتورة للدكتور .......... وفجأة قلب الموضوع على غلو البنزين وإزاى دا هيأثر على حال المعيشة وغلو باقى السلع مع ثبات المرتبات و, ,....,و ,....., و
أنا للإتنين : ممكن إتسإل ؟؟
مفيش مانع على فكرة تربطوا المشاهد مع بعضها
على أساس أن ما يحدث على المستوى الإقتصادى جزء من كل
فالفساد منظومة متكاملة ومقننة فى بلادنا
فنحن نعيش فى بلد يشتكى فيه السائق والأستاذ الجامعى على حد سواء من إرتفاع الأسعار والتعب المعيشى
فلكم أن تتخيلوا كيف سيكون وضع هذا البلد سياسيا وعلميا وتنمويا
مشهد5
7\5
إنسانة برضوا عارفة إنها مقصرة فى حق المدونات كلها وحاسة بالذنب , لكن أعمل إيه
عندى 8 مواد ولله الحمد ومن غير حسد هما خالصين ومتقفلين من أول الترم !!!!؟
بس مفيش مانع برضوا من المراجعة
فعذرا من الجميع على عدم المتابعة وإن شاء الله هخلص إمتحانات على خير وأقيم عندكوا
بس أهم حاجة الدعاء
بجد بجد ضرورى يعنى نظرا لوضعى الحرج مع كتب الدراسة
ودمتم
19 comments:
السلام عليكم
اختنا الفاضلة بجد مشاهد جميلة تعبر
عن الحال الايام الماضية
بارك الله فيكى
ربنا يوفقك في دراستك
ربنا معاكى يا سكر
بس قوليلى عجبك المعارضه قالوا كلام فى الهوا طيب انتى شيفاها ازاى ممكن تقولى ليه التخاذل اللى بقينا فيه
طيب نعمل ايه احنا معندناش قائد ولا سياسه ولا اقتصاد
يالا كفايه اصلى بجد تعبانه جدا وحرام كفايه
ربنا يقويك يا رب
كل دا وانتي مزنوقة في امتحانات
أمال لما تفضي حتعملي ايه
هذا ليس حسدا انما غبطة لنشاطك الرائع
ما شاء الله لا قوة الا بالله
ربنا يحفظك
هذا في الشكل اما الموضوع فيحتاج لكلام كتير واشتباكات ومعارك انتي مش فاضية لها دلوقت
وانا كمان مش فاضي وعندي امتحانات مثلك تماما
يبقي وقت آخر
ربنا يعين الجميع
فالحقوق لا توهب خاصة مع نظام مثل نظامنا
والكرامة لاتستجدى خاصة مع وضع مثل وضعنا
إذا فلنتحمل جميعا طالما لم نتحرك جميعا
ولا يشتكى أحد
يا شعبا استعذب الشكوى
---
ممتاز
---
هي يا صديقي ظُلمة أو أن تقوم !
لا بين بين
فإذا قعدت فلا تلم
شبح الظلام لأكله تلك النجوم
ولا تلم
شمس النهار إذا استجارت بالغيوم
---
اعانك الله ووفقك في امتحاناتك
ونفع بك
وبارك فيك
طبعا لازم كلنا ندعى جامد جدا من كل قلبنا تخلصى وبتفوق مبهر
علشان نستمتع بالموهبة المتميزة
التى حباك الله بها وربنا يزيدك
وبصراحة الملاحظ ان ابداعاتكم تزيد تحت ظغط الامتحان
هو ده حال الشعب
بالتوفيق فى امتحاناتك
آآآآآآآآآه يازهراء
ولسه
طول ما احنا ساكتين ومش بنعمل حاجة غير الشكوى
صدقيني يازهراء انا كنت متوقعة قومة هوجة اى حاجة تقول اننا لسه عايشين بس لقيتنا كشعب موتنا من زمااااااان من اول زيادة سكتنا عليها واخدنا على دماغنا وقلنا ماشي ولا يهمكم المهم الاب والوريث يعيشوا
---------
ربنا معاكِ ياقمرة ويوفقك وتبقى اجدع مني في الصحافة :)
مستنية تليفونك على الميل يازهروءة :)
حاجات معبرة فعلا عن واقعنا بشكل منطقي ومباشر
كان الله لك وسهل لك عسير ونفع بك الدين
تحياتي
فزلوكه
كان متوقعا رغم معسول الكلمات
رغم أنف جورج أسحق والرائع قنديل ورغم أنفي
الفشل
كان هو المتوقع
لم أخرج من البيت
لم ارفع صوتي
لم أنتظر 5 ساعات في التحرير لأقول كلمة حق
لم اتحرك بأتجاه مجلس الشعب
لم أزعج مملوك لاظوغلي
لم أخيف المالك بمصر الجديد
لم أفعل شئ
في المرة السابقه كتبت أقول في لغة ركيكه ولكنها كانت من وحي اللحظه
قادرون علي الحراك
هكذا كان الرهان
ليس للسكون فعل
في كل أيام الزمان
كانت هذه وجهة نظري
أن نكون في الشارع
في ميدان التغيير
رافضا البقاء في البيت
لن توهب الحريه ولكن تنتزع
كان هذا هو رهاني
كما كان رهاني علي الاخوان
خسرت جزء وربحت الاخر
أنظري الي كم عربات الخوف المركزي يوم السادس من أبريل
أنظري الي كم الرعب الذي سيطر علي النظام
وقارني
وليس هناك مجال للمقارنه
أسف جدا للأطاله وربنا معانا كلنا
دكاتره رخمين قوي ورايا 5 أمتحانات في
أسبوع ونص
والله حرام عليهم
:)
خالص تحياتي
أعتقد إضراب 4 مايو فشل لأسباب كتير منها إن كتير من القوى السياسية شاركت كترضية خاطر للشباب .. مش أكتر
كتير منهم كان غير متحمس فعلاً، ماكانش عنده أي خطط واضحة!
والشعب كمان اتضحك عليه بالـ 30%
...
أما لزيادة أسعار البنزين
فالبعض تسائل: هل يفعلها "السواقين"؟؟
وفي النهاية .. تذمُّر يومين ، والوضع كما هو!
والشعب قبل بالزيادة في أجرة المواصلات وكل حاجة وسكت!!!
أما عن لغة الحوار .. اسأليني أنا :)
يوماتي معاهم!
...
بما إنك ذكرتي حال البلد علميًا فاسمعي دي بقى، لو ماكنتيش
أثناء رفع الأسعار لتوفير موارد للعلاوة المزعومة
قاموا خفضوا ميزاينة حاجة كده مالهاش لازمة الأيام دي
اسمها البحث العلمي ... يعني كده يعتبر اتعدمت بعدما كانت أصلا ملاليم!
يللا .. جات عليها
...
ربنا يوفقك في الامتحانات
حاجة غلسة فعلا ومالهاش لازمة
ربنا يعينك ويعينا عليهم!
أنا عندي امتحانين بس :P
بس للأسف مخلصوش لسه
السلام عليكم
دى اول زيارة ليا وان شاء الله ما تكونش اخر زيارة
احسن حاجه المشاهد اللى من الواقع دى
وجميل فعلاً موضوع المؤتمرات دى
كنت سعات احضر مؤتمر واللى بيتكلموا فاكرين ان الدنيا كلها بتسمعهم
واللى حاضرين فاكرين ان الناس كلها هتنفذ
ههههههههههههههه
مصر بلدنا دى زى العسل
صور مختلفة .. يجمعهم الحديث عن سلبية شعب
أعانك الله على امتحاناتك .. ولا تتأزمي بسبب عدم متابعتك للمدونات فالجميع لديه ما يشغله
:)
ربنا ينجحك باعلى تقدير وبالتوفيق يارب
ربنا يوفقك
وتنجحى بأعلى تقدير
أن برضه عندى إمتحانات
إدعيلى والنبى
لألألألألأ...ما تفهمنيش غلط
أنا عندى إمتحانات أولادى
خامسة إبتدائى وثالثة إبتدائى
إلا حد يقولى ..؟؟
إنتوا مش ملاحظين حاجة فى كلمة(إبتدائى)..؟؟
لو قسمناها جزئين مع جعل حرف الدال مشترك ومكرر ستصبح(إبتدا)(دائى)..
وربنا يشفينا جميعا من هذا الداء
وإن دل ذلك على شيئ إنما يدل على بعد نظر القدماء
لمعرفتهم أن التعليم سيصبح دائا فى يوم ما ..
هى الناس دى كانت ذكية كده ليه..؟؟؟
تحياتى
:D
ربنا يوفقك يا فندم
بس فعلا موضوع الاضراب و البنزين حاجة تضحك اللي قلبه ميت يعني :D
هههههههه
شر البليه مايضحك
ربنا يوفق حضرتك يافندم
هههههههههههههه
ازيك يا زهراء أخبارك ايه
نستنتج من ذلك إن الإمتحانات وضربات الشمس والتعب بيخليكى تبدعي انتى وناس كده :):)
والله يا زهراء أنا عن نفسي كنت أشك في نجاح الإضراب خصوصا بعد الإعلان عن زيادة 30%المزعومة لكن لعله خير
عن ثقافة الشعب يلزمنا تغيير في عالم القيم أولا حتي نحقق الأمل المنشود في الواقع
لا تحزني أبدا يا حبيبتي فتلك الأيام نداولها بين الناس
بصي لما تخلصي نتناقش إن شاء الله
ربنا يوفقك ويرزقك سرعة الفهم والحفظ ويرزقك كتابة الإجابات الصحيحة ويعينك ويرضيكى وتحصلي على أكثر مما تتمني
خلصي بقه بسرعة عايزة أشوفك يا بنتى
Post a Comment