تاجااااااااااااااااااااان

أن يأتى لك تاجان , فهذا أمر ممتع وجميل

لكن أن تستقبل تدبيستان , فهذا مقلق ومتعب

ودا بالظبط إللى حصل معايا

التاج الأول ,, وصلنى من الصابرة المحتسبة منوون ,, صاحبة مدونة "موجودة أنا "

أما التاج التانى فوصلنى من دكتور

wanna b aphisican ,,,

صاحب مدونة "طبيب بلا سماعة

وأنا من هنا بشكرهم وبقولوهم .. مردودة إن شاء الله

ولما كان البوست إللى فات دسم شوية وطوووويل شويتين

ولإنى عارفة إنكوا كرهتونى بسببه

فقولت هصلح غلطتى بالإجابة على التاجين دول,, فى محاولة لإنقاذ ما يمكن إنقاذه

نيجى للتاج الأول

قواعده

اولا:اذكر عشرة اشياء عن نفسك

بداية حكاية اذكر عشر أشياء عن نفسك دى صعبة جداااااااا

لإن صعب إن الإنسان يقيم نفسه

مش تواضع ولاحاجة

لكن لإن العظماء _إللى زيي _ لايجيدون التحدث عن أنفسهم ,, لأنهم دائما وأبدا يبخسون أنفسهم حقها

D:

لكن هتوكل على الله وأجاوب

1- اسمى زهراء,,, وعندى حب خاص كدا لاسمى
2 - أنا من مواليد برج الأسد ,, وبرضوا فرحانة بدا جدا ..مش عارفة ليه ؟؟

3- مؤمنة بمشروعى الإسلامى جداااا ومقتنعة بيه إلى أبعد حد

4- مبعرفش أعمل حاجة مش مقتنعة بيها خاالص,, وبالمقابل لو اقتنعت بحاجة بيبقى عندى إستعداد لعمل أى شىء من أجل إنجاحها

5- أكتر حاجة بكرهها فى حياتى الكذب ,, لاالكذب على نفسى ولا أى حد فى الدنيا ,, ولوحصل وحد كدب عليا بيبقى رد فعلى مش لطيف غالبا

6- بيتوتية إلى حد كبييير ,, ودا بيخلى أصحابى يتخنقوا منى ,,لكن أنا فعلا مبحبش الخروج كتييير وخاصة فى الصيف

7- كتومة إلى حد كبير ومبحبش حياتى تكون "أوبن بوفيه " إللى عايز يعرف حاجة يعرفها

8-مبحبش حد يزعلنى عشان مبحبش أزعل من حد...

يعنى

لما يكون فى ناس بحبهم ,, ببقى مش عايزاهم يزعلونى ,لإنى مش عايزة أزعل منهم.... "بتهيألى كدا وضحت ؟؟"

ومبزعلش بسرعة .. لكن لما بزعل من حد بيكون وصل معايا فعلا لمرحلة "اللاعودة

9- بكره الدوشة والإزعاج والصوت العالى جدااااااااااااااااا ,, وأعشق الهدوء والأماكن الخضراء

10- مشروع صحفية......... وافتكروا إنى قولت مشرووع

هذا أنا ..... بكل تواضع!!!!!!!!!!!!!؟؟

ثانيا:اختر خمس اشخاص تهدى لهم التاج

إممممممممممممممم

تقريبا أنا شفتوا فى معظم المدونات

لكن هقول إللى على بالى حاليا

مها ميهوووووووووو

ديدو ...إللى هى خديجة عبدالله

خالتو إيمان العزب

DR- wanna b aphisican

"كما تدين تدان "

باشمهندس بلال "البلد بلدنا "

ثالثا:لا تهدى التاج لمن اهداه اليك

حاااضر

رابعا:عرف اللى بعتلك التاج انك نزلته عندك

حااااااااااااااااااضر

:::::::::::::::::::::::::::::::::::::::::::::::::::

التاج التاااانى

بسم الله

أذكر 5أحلام تخص ماضيك كنت هتتخلى عن إيه فيها و هتتمسك بإيه لحد دلوقتى

أول حلم :

كان عندى حلم إننا نروح نعيش فى الجنبنة بتاعتنا مع الزرع والشجر والنامووس

لكن الحمدلله عدت إلى رشدى وتخليت عنه

تانى حلم:

إنى أدخل كليتى الحالية ,, وأكون إعلامية متميزة وركزوا على متميزة دى

تالت حلم:

إنى كنت أعيش فى الأندلس ,, وأعاصر الفترة دى

رابع حلم:

كان عندى حلم من وسوسة الشيطان ألا وهو إنى أجرب إزاى ممكن نغير الرئيس,, يعنى بسمع عن إنتخابات ومرشحين وحاجات كدا

من باب التجربة بس !!!!!!!!!!؟

خامس حلم :

كان فى بعض الأشخاص المعينين ,, كان نفسى يكونوا معايا فى نفس الجامعة ,, لإنى كنت عايزة ذكرياتى الجامعية تكون معاهم

أذكر خمس أحلام تخص مستقبلك و ما تتمناه منه

أولا:

أنشىء مؤسسة إعلامية مهمتها تكوين كوادر إعلامية أمينة وصادقة

ثانيا

أن أرى مجتمعنا الإسلامى أفضل مجتمع فى العالم ,, لإن عندنا ما يؤهلنا لذلك

ثالثا

أعيش يوم بفلسطين عشان أفهم الناس إللى هناك جايبين القوة دى منين ؟؟

رابعا

إن أبى وأمى يكونوا فخورين بيا ,,

خامسا

خليه لنفسى بقى

أذكر شخصين - على الأقل - متواجدين فى حياتك كنت تتمنى وجودهم من قبل

لأ الحمدلله كل الناس إللى عرفتهم .. حاسة إنى عرفتهم فى وقتهم

سارة وسهام بس إللى كنت أتمنى إنهم يكونوا أقرب ليا _مكانا _ أكتر من كدا

أذكر شخصين - على الأقل - غير متواجدين فى حياتك و تتمنى وجودهم مستقبلا فى حياتك و حياة أولادك

جدو الله يرحمه,,كنت أتمنى أن يكون معى

سيدنا عمر بن الخطاب,,, من أكتر الصحابة إللى بحس بالعظمة لما أقرأ عنه

أعتقد لو كان فى حياتنا كانت حاجات كتيير اتغيرت

أهدى التاج لمييييين

باشمهندس عياش

منوووووون

"من حفر ...."

إسلام ناجح

صاحب المضيفة

واحد من البلد دى